Archive for ديسمبر 2018
عقارِب الدمع العريس
محمد طه القدال
ديسمبر2018م
ماك بلداً مهمَّل وما اتعرفلك سيد.
ونايحات المداين الشالقة ما بكَّـتني
يوم طيرة الهموم ركَّتني
ما سكَّتني من مغناك قبايل العيد،
غير تذكار بنــيَّات البحر في الضفَّة
فرخه وصرخة
شنطة
ونطة
شهقة وفهقة
وانا الفي القيف ..
أزوزي بعيد
مهوِّد زي هويد الصيد
أحَـنِّـس
في وِلاد الكلب
واسرِّح لي بنات ابليس ..
وهن في الشيمه قبل الغَـرْقة
ماعارفات ..
ملاواة البحر .. هي الحِجلة؟
والَّـا دموع عروس وعريس
ولَّـا عقارب الدمع العريس.
وهن في الشيمة قبل الشَرْقة خجلانات
يكون الموج فَـتَـش فستانهن الملبوس
وشافهِن مُخـبِـر الدمع العريس.
وهِـن في الشيمة قبل الشَّـرقة
شافَـن دمعهن متداري بي موج البحر ..
متروس .. من الدمع العريس
وهن في الشيمة قبل الشَرقة
سَـمَّـع حِـسَّـهِـن بى غادي ..
حس اماتهن المدروك وصوت ابواتن الممغوس
-
يا
بنياتي .. يا وليداتي
-
لاقوكُـن
صَـبَـيَّن مِـيَّه؟
يادوبُن علي باب
حلم،
واتلافوا بحر
النيل؟
نهاير العيلفون والليل؟
ودفروا النيل
قبايل العيد؟
ولاقاهم ظلام
الموج؟
ومن فوقهم رُصَاصات
الظلام والظُـلم؟
وغنيتو القبيل غنَّـنُّوا
نسوان الفريق في القيف ..
مع الجاغريو؟:
-
(الوليد
الضيف
غرَّقتَـنُّو كيف؟
-
الوليد
الضيف
غرقتنو كيف؟)
حالتي المايلة هي الشاكتني ..
هُـم في عيد ونحن ف عيد؟
هُـم في حال .. ونحن نْخِـيس؟
والمَغَـسَة الدموع الغايسة
في لُـجَـج الصفوف الخايسة،
وكل المغسة ..
تبقى البَـرَكة في الدمع العريس
***
حاكوكة النشيد حكَّـتني
شَـرقة وغَـرقة
في قولة الحيقيقة الطايلة
وتب مي خايلة يوم بَـقَـصَـت ولادِك إيد.
ساكته علي العيال يا يمه؟
قرقوراً تحت كركور ..
عيونهم زايغة
لا هِـيناً يكَـفِّـي الجوع
ولا أمنا يحاحي الخوف
قلوبهم زي طِـويرة الجَـنَّه في القلابة
وبرميل القنابل هَـدَّ فوق الروس جبال الطُـور
وفرطاق المخيخ النَّيْ ودمُّه بيغلي،
فوق جبَّال صعيد كادقلي ..
يوم الدَانة جات الميس
ويا مغسة صفوفنا الغايسة
في لجج الضماير الخايسة
كل المغسة ..
تبقى البَـرَكة في الدمع العريس
***
حاكوكة القصيد حكتني
شرقة وغرقة
وَتَّ الحايله
مَـن قال الهموم سكَّـتني
من شُـفَّع مدارس نيرتَـتِـي المجدوعة جُـوَّه
الخور.
وحاكوكة القصيد حَـكَّـتني
إلا أغني للأطفال
واطمبر وافضح الذمم اللديحة
ما الفضائح في الكلام جمع الفضيحة
والفضائح ممشى عارهُـم
والفضائح يا ها هيلهُـم
والفضائح يا ها كارهُـم
والفضيحة تَـباري سيدا
محل يقبل يبقى عبداً من عبيدا
والفضيحة عليها ريحةً ..
ريحة الجيفة المِـنَـتِّـنَـة .. وش مكابر،
أو .. قَـفَـا الخِـلقة السَّـنيحَـه
الفضيحه الدين مَـغَـبَّر
بالجعير .. الله أكبر
وهيَ لله .. مَـشَـرتَـمَـة بالنفاق
ولا للجاه تكضِّـب سيدا
في هادي الحُـلوق بشمانه تدَّشَّـى المخازي
وتلفظ النفس الكَـليحة
وكل المغسة في هادي الصفوف الغايسة
في لُـجج الضماير الخايسة
كل المغسة
تبقى البركة في الدمع العريس
***
يا فاطمة الصيد الوارد
يوم فوتكَـن ما يوم فوت
يا فاطمة الخيرِك وارد
ويالوارد خيرِك يوت
فُـتَّـن والحسن مهمَّل
والحزن بنالنا بيوت
والدمع عريس ومحنن
يوم شكرو .. هو يوم الموت
سرطان مطلوق اتجــنَّـن
حِـلتنا بقت حي موت
حاويات لعيالنا انشرَّن
والكوبتاجون مَـتلوت
يا ها الحاويات العَـرَّن
السَـمـْـسَـر و الكهنوت
يا ها الحاويات العَـرَّن
السَـمْـسَـر و الكهنوت.
***
فافضحوهم
وافضحوهم
وافضحوهم
من جِـقور الكُـبري، ضَـب سِـنَّـار، إلى نَـمْـل
الدَنادِر
وافضحوهم من قُرانا الفايقة حامت في البنادر
وافضحوهم من بنوك تِـتمَـطَّـى من عيش الفقير
لا عند صُـفوف العيش
صفوف العار
صناعة السوق
بنوك اللغفة قبل التسويات والخم
بنوك اللغفة شان التسويات والخم
بنوك اللغفة بعد التسويات والخم
لغف بالشَـرفَه ينخم بالقنادر
سقوف مبذولة للشُّـفَّـع
ها ديل شفع سنين الغفلة
راضعين الحرام بالدادا
رضاعة كلبة حارسة ردادا
لا بـيابوها لا بْـمُـرقوا النصيحه
والفضيحة ولا بتباري السُـتره
شِـن
لَـمّ النَـبـيحة على المَـليحة
ياها التوب على فرعون
إذا غطَّـاه قدام روحو ..
هو العرَّاهو قدام الخلوق
ومنظر في وشوش الناس ..
بلا العورة ..
الفضيحة الليها ريحه.
هِـيَّ من فقه التَّـحَـلُّـل
وهي من شيلني وبشيلك
وهي في القبح المَـشَـرشَـر فوق غَـسِـيلك
البلد مي حق جَـنابَـك
لا هي للهُـبُـل البِـغَـنُّـوا على عديلك
أشحد الله يجيب عقابك.
الكريم إن جَـاب عَـقَـابَـك
البلد لا هيل عقابك .. لاها هِـيلك
×××
وبُـكْـره الدنيا غير الدنيا يا يابا ..
بُـكْـره الدنيا غير.
وبكره الدنيا تصبح دنيا من غيركُـم
وتبقى الدنيا خير
ونفرز طيرنا من طيركُـم
تفوت غربان
وطيرة الجنّـة فوق حَـلَّالنا .. طير
وتشفَى حياتنا .. بعد الهَـردَبِـيس واللَّـتْ
بلا سَـرطان .. ولا فَـلَـتان
ولا مغسة دموعنا الغايسة
في لُـجج الضماير الخايسة
لا الدمع العريس.
عقارب الدمع العريس (ديسمبر 2018م)
Tag :
قصائد,
