Archive for مايو 2015

إلقاء القدال- فيديو

https://www.youtube.com/watch?v=egIt9cCNDqs

كلام الرتينة بت سالم ولد عتمان، في حنة علي الشاشوق

بنية بنية لي سالم ولد عتمان ،صلاة الزين وسموها الرتينة

أمها بت علي الخمجان خريف الرازة عزينا

كبار الحلة أباتا ، و بكار الحلة أماتا

وبتمرق زينة.. تبرق زينة ..تمشي تهاتي وزينة

و بلا الربعة التحجِّل ، شاكية من شبكة كتافا

وفوق الجيد على ضهر البوادي تغني مي خاتية الزرافة

كلاما رصين .. بسيما الودعة، إلا تزيد الطافة

ملاما حنين ..

كلاما يطمن الهمباتي والمجلوبة متعارض كتافا

وقارية وكاتبة تحمد سيدها.. ماخدة على البنيات الشرافة

وكذا البريبة تبرد عيني .. لا تغشاها.. لا أحضر نشافا

وكان في الحلة يوم حنة علي الشاشوق

مشينا نقدم البنوت علي ضو الرتاين

عيونهن هارجة تنبح في الفجر والليل قريب واقف يعاين

خدودهن واجّة زي جهر الكهارب الفي المداين

وكان الليل وما في الحلة من الحفلة ، إلا صداها

كان زغرودة .. كان غناي

رقيص الشامة بت حمدين .. وعرضة حامد العولاق

وشنق ود سعد طاقيتو، شان في الحلة سوكنتين

وعيّط ود مجمر زين ..

عشان الزينة رقصت زين !!

وفي الشعقيبه كان بازمالو شبالين

وسهرة وين .. وبهرة وين .. وجهرة وين .. وسكرة وين

اقول آا بنية : ليش ما تهِمِّي فوق زولا مشلهت فوق دريبك

لا النَّــفَس مجبود .. و لا لحق الغزالة !!

وقفت .. وانبهط رمَّاشة .. جدعت بالبسم رشاشة

-: يا المهجوم.. يهجمك الله كان داير تسيلي الخلعة ،

قالت والعيون ضاحكة .. في ضو الرتين بشاشة

عاد من حيني جاتني الحالة ..

- قلتلا: لا لا ،

وحات النعمة يا بنية البريد ...

في الريدة .. ما بخبر فسالة ..

حدرت باسمة ،

- قلتلا: عايني

تسلم عينك، إلا حقيقة مو ساهل كتالا

- حلفت ناضرة ، حالفابو الصباح الباش يلون في المشارق

والنسايم الجاية من تالانا تالا ..

- وحات أمي البعزها زي تراب حلتنا .. ببقى حداك يالمريود

وأقول لي هلنا ناس قدام :-

و في ها الحالة مي شينة القوالة .

و اساعل القمرة في شانك ..

- اقولها: هيلا يالقمرة،

وتانية وهيلا يالقمرة ،

و تالته وهيلا يالقمرة

- ودحين ساكن رويشات القليب في الحلة ما رشا المقالة ؟

- وحات الفرحة في ها الليل ،

بشوفك فيك عز ابواتي ،

ضرعاتك خدر يالباهي ، ما داير الي من غيرك كفالة

وجاتني النهمة ،

- قلتلا :

اقيفي يالمريودة، داير ارميلي مرباعين

وتبقي حمالتي عند سيد الحمالة !!

قالت والفجر في خديتّا:

- يالممسوخ .. ويالمسخوت .. حدانا العين !!

بعد ما تسدر الضحوية ،خت الفاس على كتفك

و بوجح غادي ،

بوبح غادي ،

نم فوق البعجبك زين ..

- قلتلا : زين ..

وداك الحين .. بشوفك يالرتينة مع الشمس بتلالي

مِـنَّـــاك للسحاب الكابي فوق حلتنا

كان عامل ضُلالا

و بشوفك في عوينات الصبين ....

العشق لصف ضياهن ..

والنهار وصف خطاهن

والصبر ..... زارعنو فوق ضهر البيادر،

فوق كتافين السقالة ...

- بريد ريدِك سماح أهلي .. و بريد ريدِك كفاح أهلي

و بريد مهواك ...

واريد انسانِـك الجوَّاك

و اريدِك و الله زي أخر الحتالة ..

وادولبيلك ..

اشيلك غنوة للسمحات ..

و انمك في تراتيلي ..

و أدوبيلك

وكل ما العتمة تنزل سابلة ..أنسى عناي

أتاوق لي قناديلك ..

واشد حيلي ...

و أدوبيلك

إذا مغناي

يبّــرِّد في الحشا صبرك

و يرجع لي تهاليلي ..

بدوبيلك

و لو الشوق عرف بكاكي !!

أطري غناي ..

أطري غناي .....

عليك العِــزَّة يالمريودة .. دوبيلي

وعليك العزة يالمريودة ... دوبيلي.

نص كلام الرتينة بت سالم في حنة على الشاشوق

Tag : قصائد,

اقرأ المزيد

https://www.youtube.com/watch?v=eeHQ_Pd94Pk
مجموعة عقد الجلاد الغنائية

محمد طه القدال (فيديو):
https://www.youtube.com/watch?v=3BbcgPmxOV8

خرجت المقاومة الفلسطينية من لبنان عبر البحر فدخل أرئيل شارون أرضاً حتى بيروت وأفسح المجال للمليشيات لتذبح النساء والأطفال والشيوخ داخل مخيمي صابرا وشاتيلا.. وانتظر حتى أتمَّت المذبحة الجريمة التي ما زال العالم يتجاهلها.

مسدار أبو السره^(*) لليانكى^(**)

(*) المسدار: مسيرة العاشق إلى المعشوق، أبو السرة: استلهام لسيرة الصديق الراحل السر سليمان الشيخ، عليه الرحمة

(**) اليانكي: الأمريكي الغازي المستغل المنتزع

أُمَّاتى^([1]) القبيل بى حِنَّهِن^([2]) لجَّـنِّـي

كَـرْفَـه وقَـلْـدَه كيف شوق اللبن رَجَّـنِّـي!!

حزناً جانِـي فى ميع الصبا يلجِـنِّـي

أطلع منِّـي يا جلْدى المنمِّـل جِـنِّي

وأطلع منى ياحزناً بقى مكجِـنِّي^([3])

خَلَّـنـي ابْدَا مُسْداري

واودى قفاَي لى داراً بِـقَتْ^([4]) ما داري

جيتها وجلدى بينو وبين عضاىَ^([5]) الشحمه

الا النار بقت قَدامى

جلدى الليله بينو وبين عضاى... المافي^([6]).

الا ترانى شوَّال الكِـبِـسْ^([7])

نفِّيخ جراريب^([8]) الورم هَـدَّامي^([9])

فى جلدى الورم؟ قولن لي ..

ولا صحي^([10]) الورم عَـضَّامي؟

سفريتك ما فى النيه

ما ها الكانت مَـحَـريَّـه^([11])

خابراك عِـرِّيف

زم العربان ولا قيام الورديه؟

مالك ؟ تريان^([12]) ومنَـدِّي

كاسي الكِـتّان والهندي

قولَك كِكّيف ؟ !

ترجى البيشان^([13]) .. ولا الغربه ال بالزندى؟

برقاً عِـبدِلِّـي^([14]) الوزنِ

يا طاش .. يا جاب المزنِ

فرِّقْ ياالضيفْ

فعل الغضبان..

أم فرفيرات^([15]) الحزنِ؟

وشِـن القعده يا ابو السُّـرَّه؟

شن القعده فى ضل العمارات ام كَـمِرتاً^([16]) بَـرَّه؟

ضُـقْنا الحنضل اليانكي^([17])

وبلعنا المره

كملت كوتة التمباك^([18]) صَـقَعْـنا الجِـرَّه^([19])

وكت إتقفلت شِـقَّيش^([20]) ..قَـبَلْ ..بالمره

نرمي امُرنا فى بلد المعاني الحُره ؟

(الشم^([21]) خَـوَّختْ^([22])

بَـرَدَنْ ليالى الحرَّه…

تلقاها ام خدود الليله مَـرَقَتْ بَـرّه)^([23])

.. مرقت بره

تغلى مدِيدة الحِلْبه التسمِّنْ ردفها!!

السمن الـمَـبَـسْـتَرْ .. يانكي.

والويقود^([24]) بعيرات الدخان فى العين

وفي الفَشْفَاشْ^([25]) يسوِّي عمايلو

شن فايدة مديدة الحلبة ؟

الويقود .. وشالو اليانكي.

يا ابو السرة

قامت من دخاخين العمى

تلمع وشيها^([26])

اليانكى مستنيها..

كان اليانكى مستنيها فى مراية السَجَم فى الليل

لقيتها متل فريخ الطير.مَـرَقْ ود عينها من ود عينها رجَّافة المزمَّـلْ حُمَّـى، جَـفَلتْ مِنو وقعت عندى ...صدرها يغلي..يأبو السره شفت اليانكى فى ود عينها. شلتها للبَحَـر يمكن يغسِّلْ عينها من اليانكي. فُـتْـنا الحَجْـره^([27]) بالكَـتَّه^([28]) وغطسنا مسافة تبقى قَـدُرْ مسالك الريده، ما لاقانا من يغبانا، فى البحر الفَـدَرْ تحتانى .. ناس عارفاها - ناس عارفاك - ناس عارفاني. لاقيت القَعُوي^([29]) والبلطى، قَـرقور السمك ودَّاني لى دابي^([30]) الخُـشَـشْ^([31])نادينا عمال الطمي، الصارقيلة^([32]) والقرموط وود المويه .. فتنا عليها كانت نايمة، عَجَّال^([33]) البحَـرْ حارساها..كانت نايمه بين حجرين وضُل ساسويه^([34]). مسكنا دَرِبْـنا، عمال الطمي الصحُّوها لـمُّوا حصى البَـحَرْ، قسموه، يات من كان سبِـعْ جـمْرات، دابي الخُـشَة قال: أدوها فى الجمرات تلات سبعات. قلنا: أدوها فى الجمرات تلات سبعات. مسكنا دربنا، عمال الطمى الصحونا خابرين الدروب، مَـرَقوبْـنا فى مشرع مسارب الضي، لقينا الدنيا تترجَّانا قوقى^([35]) القمرى، خَـوَّى صقير^([36]) وعوَّى حدَىْ^([37]) وعمال الطمى الصحوها لمو على البيعرفوا الصَّـيْ^([38]). حصى القيزان دوابـي الدارقه^([39]) والسحليه والناس التحت.

الناس التحت خابرين عمايل اليانكى

مره معونه للغَّاف ومره دوانكي

شِـن معناها جبيها اكان ملوه بوانكي^([40])

صوتها مكتِّـمُه القَـرَبـينْ^([41])،

سيوف وسونكي.

قولَـن للأخلوا ديارُه

دمَّك فّـْرهد فى نارُه

غوَّر فى الأرْضْ، طاروا صقرينْ

أولاد الأرْضْ ما طاروا.

لحمي غطى بن عمِّي

شو صار حالو يا إمِّـي

منديل العِـرض؟

فى بيتِ الدينْ

دمِّـي ما يخلِّـي دمِّـي.

قُمنا من دير ياسينْ

صرنا فى جذر التينْ

عم نسقى بعضْ

حُب الزييتونْ

بَـدُّو يرجع للطينْ.

صابرا تحت الداوريه؟؟

صابرا فوق الداوريه

يا حال الضد

لحم الطفلين

نابِـت غصن الحريه.

جذرى مو فى شاتيلا

ما قال حالى ياويلا

حِـنَّا فى الارضْ

أرضِ فلسطينْ

يأمى هيلا هيلا

هيلا وهيلا يأبو السره كُـج^([42]) العينْ

تخَـبْـر الشينه من الزينْ

تَـفُـرْز الساري من الطاري

يأبو السره كج العين

ومدو صباعك السبابي

قول للغافي: يا زول هُوي.

ارخى الغُـرْدَه^([43]) للعَـنَّافي^([44])

شد القِمْري^([45]) بالحوبابي^([46])

فى مسدارنا شلنا نهارنا

يأبو السره

فى إيدينا من ساسُو البَـحَر عقدين

مَـسَـكنا دَرِبْـنا

عمال الطمى الصحوها

خابرين الدروب مرقُوبنا^([47])

فى مشرع مسارب الضيْ

لقينا الدنيا تتحرانا قوقا القُمرى

خوَّى صقير وعوَّى حديْ

وعمال الطمى الصحونا خابرين الدروب ..

وكنا جماعه;

دابَّـات الأرِضْ

والسايمه

عوَّامة البَـحَـرْ

والطيرْ

وحتى الغيمه

قَـصَّـاصة الآثر فوق راسنا

شيافه الدَرْبْ

ضنيب^([48]) اليانكى .

قال القمرى للضُـلِّيله:

- خَـلِّيك صاحيه

زوغ اليانكى لا يودِّرنا

قال الدابي:

- إن يغباها ما يغبانى

ولما الشم^([49]) مودِّعه غاربه، وصَّـت جُـملة الصَّـقَّـار عيونهم كارْبه

ابقوا ألِـفْ بـفوت للمِـتْـلَكُم ناهضين

وفوق ديناب^([50]) عريباً غادي

قال السحلى:

- لا نغشاهُـ

ديل عربان توابع اليانكي.

قال الجمع:

- لا نغشاهُـ

ديل عربان توابع اليانكي.

خَـلُّـوها العريب الغايبه

والسراق طبيقهُ معاهو

تيجاناً عروشها الخِـرْوِع^([51]) الهَـشَ العويش

النار تعَـلِّـب^([52]) فوق عُقال العرش

ولا خصَّـانا بى هدي^([53]) العروش الـهُـرْبَـة^([54])، يأبو السره، لا عقّال.

مسكنا درِبْـنا،

عمال الطمى الصحونا خابرين الدروب

مرقوبنا من وادى الضُلُمَّه الكان

عُـقُب لـمِّـينا فى باقى الجَـمِـع

قاصَّـين دريب اليانكي..

سَـنُّور الغِـيَـبْ^([55]) فى الكنغو

صَبَراً^([56]) من جنوب أمريكا

من كَـلْهاري^([57]) ديباً ضارى

والتمساح وليد أمازون^([58])

ونمراً فى النمور كمبودي

وأم رخم الله^([59]) مكسيكيه.

ولـــمَّ لـميمنا والشمس البتوقد فوقنا

شدَّ شديدنا لي التمثال^([60]) مَـشَـيّل روقنا.^([61])

عالَـم حُـر يدوعِـل^([62]) فوقنا

لى يوم سوقنا^([63])..

نبصق فيهُ فى عينيهُ جَـرْ واسوقنا^([64])

يا شمسي طِـلِّي طلي

شاوري ع بيتى دِلِّـى

كيال الكيلْ؟

ختياري ماتْ

ظِـلِّـى عمْ يحرس ظلي.

***

عادل ع خَـيِّي مَـيْلي

خَـيِّي ما يحمل شَـيْلي؟

ما خَـفَّ الشَـيْلْ

ثانـي المراتْ

ناطِـر رصاصي سَـيْلي

عَـيْـني فى الفيل .. ما ظِـلَّه

كِـلْـنا نِـدْريه ما نْضِـلَّه

يا ويل الويلْ

نِـرمي الجَـمْـراتْ

عَدْ المستشهِـد كِـلَّه....

([1]) أمهاتي

([2]) حنانهن

([3]) كاره لي

([4]) صارت

([5]) عظامي

([6]) اللاشئ

([7]) جوال لترحيل القطن يكبس فيه كبساً

([8]) جمع جراب

([9]) جمع هدمة - ثوب

([10]) صحيح

([11]) مرجوة

([12]) مفعم باللين

([13]) جمع البوش- الاحتفال

([14]) عبادي من جهة القبلة

([15])واحدها فرفرة

([16]) كاميرا التصوير

([17]) الأمريكي

([18]) التبغ

([19]) الاجترار

([20]) من كل جهة

([21]) الشمس

([22]) مالت وضعفت حرارتها

([23]) جزء من بيت شعر للشاعر الحردلو الكبير شاعر البطانة

([24]) الوقود

([25]) الرئة

([26]) وجهها

([27]) الشاطئ عالي الجرف

([28]) السباحة بالصدر

([29]) الضفدع

([30]) الدبيب- الثعبان – المقصود هنا التمساح

([31]) الأعشاب والشجيرات اكثيفة على الشاطئ تكون موطناً للتماسيح

([32]) دود الطمي

([33]) عجول

([34]) الحجر الصغير الأملس

([35]) غنَّى

([36]) تصغير صقر

([37]) حداءة – نوع من الصقور

([38]) القفر

([39]) الثعبان أبو درق - الكوبرا

([40]) بنكنوت - فلوس

([41]) السلاح الناري

([42]) ركز نظرك

([43]) حبل يحزم به البعير

([44]) نوع من أنواع الجمال في السودان، قوي وسريع

([45]) أسم الجمل

([46]) حبل

([47]) مرقوا بنا

([48]) تصغير ضنب – ذنب/ذيل

([49]) الشمس

([50]) بيت الأعراب

([51]) نبات ضعيف الساق

([52]) تشتعل

([53]) هذه

([54]) المنهارة

([55]) جمع غابة

([56]) حيوان الصبرة

([57]) صحراء في الجنوب الأفريقي

([58]) نهر في أمريكا الجنوبية

([59]) صقر ابيض ضخم بطئ الحركة والطيران

([60]) تمثال الحرية في أمريكا

([61]) الجمع يسير في خط واحد

([62]) يسمن

([63]) يوم ذبحنا

([64]) آلة يجر بها التراب لتسوية الأرض - زراعة

مسدار أبو السُّرة لليانكى (صورة وصوت ومكتوبة)

Tag : قصائد,

اقرأ المزيد

القدال

Archive for مايو 2015

نص كلام الرتينة بت سالم في حنة على الشاشوق

مسدار أبو السُّرة لليانكى (صورة وصوت ومكتوبة)

صفحة اللجنة العليا لتخليد ذكرى القدال

المشاركات الشائعة

الإرشيف

التسميات