الاثنين، 9 مارس 2015
سبعة
أوبريت للحصاد
للعيش ..
البِطلِّق الكِرميش
محمد طه القدال
1. رمية دوبيت
علي ميعادنا
رمَّـاش البروق زرْقَـَـن سحابو وعادنا
فضلة خـيرنا شبعان الوَحَـش من
زادنا
وقت العـيش قُـبَض بندُق عليهو
مزادنا
ما نقَّّـصنا .. من كُـتْـر
الفضايل.. زادنا
***
نحن الهيلنا للرايدنا وال ما.. رادنا
ونحن نشيِّل العود السديس
أكبادنا
وقت الشوف يشوف والجوع يشفِّي
البادنه
زادنا يعـفِّي مريوقنا ويكفِّي
اولادنا
***
شهَّلنا الضعيف زادنا البقوِّي
عمادنا
شوّنا العيوش تلحق هلال المادْنه
طبق الريكه مستوف والرهيفه
قصادنا
تيلاداً قديم أجدادنا لى أحفادنا
***
2. دامرقا غرباوية
قندول مديدة جاكي أقعدوا لي ام زريبه(1)
زريعة الجبراكي أقعدوا
لي ام زريبه
جيريه بت أرضنا
خد أم حنين سماكي
وكن مرقنا صدنا
صيد الخلا الحداكي
وكن نشغنا عدنا
دمرنا فوق سراكي
وكن حليمة غنت
قمرية الاراكي
سحابة لينا حنّت
دميعة البواكي
قليبي يا قليبي
سهم عشوق عناكي
لهاتي فوق حبيبي
جداد وِدَيْ بُكاكي
نفس حليمة زولتي
نسم حَسِين وزاكي
أني بنقولها قولتي
وكت نقول معاكي
بعضنا من بعضنا
علانا من علاكي
جيريه بت أرضنا
زريعة الجبراكي
جيرية بت أرضنا
زريعة الجبراكي
3. الجنوب
فرعو زرعو
أطنو(2) اُكلو
ناس تا
بلد دي
همَّن تُوو (3)
وهمن أهلو
ناس تا
بلد دي
_______
بركُّبو أصيده
وبغنو أسية
ناس تا
بلد دي
بنية قيافه
بنيه نا قهيبو(4)
ناس تا
بلد دي
________
في شمال وجنوب
ديدي قِريدو(5)
ناس تا
بلد دي
ملكية عسل
ملكوها قلوب
ناس تعبانه ليه؟
________
فرعو وزرعو
طحنو واكلو
ناس تاعبانا ليه؟
________
هُمن ناسو
وهمن أهلو
ناس تابانا ليه؟
________
4.
سنسنة في الوسط
أبعدنا
الزمان من حالك،
وبالقرب
الزمان ما بيدي
خسمتك..
عليك
الحنة بينك . . بيني
والعيش
الفتق بيناتنا
والفرح
المشق غنواتنا
جاني
وجالك
امتدي
وهِـدِّي
عَـلَيْ حنينك
فيني
برمي
عليك تعب أيام تشابيلك
متل
جُـهَّالِـك
الراتعين
خسايل طينك
أزرق
شُـفَّع الحلاَّل
بياض
ودعينك
أبيض
شفع الحلال
خُضُرْ
زي بالك
أندر
شفع الحلال
زُرُقْ
سوميتة
زي
نضمة قلوبهم في الحزن
سوميتة
بالخرز المجرتق فالك
وراجينك
صدر دفوية
لا
ضيم في الحياه جنبك
ولا
سوء ميتة
ولو
الميتة جنبك منية تبقى بخيتة
إلا
على الحياة بنمرق
نغني
التوية
بالفرح
العديل يملاني ..شان يملاكي
وباكر
اخير من الليلة
باكر
أخير من الليلة
5.
ترنيمة من الشرق
إيا يا إيا هيلا هى
بالمعدية هيلا هى
العشم ودى
والحنين عدى
بالمراكبية
***
طالت
المدة
والقلب
حنَ
زي
حنين النوق
كلما
غن
نذكر
الراحوا
بالفراق
جنَ
واهي
يا معشوق
***
من
متين فيني
يا
جرح تترى
زي
فحيح الناي
يلا
ماشيني
خوفي
من عترة
والقلب
تاتاي
***
صيدة
بت صيدة
طيبة
من طيبة
بت
جنى الجديان
مني
ليك ريدة جايبة لى هيبه
إنت
والأوطان
***
إيا
يا إيا هيلا هى
بالمعدية هيلا هى
العشم
ودى
والحنين
عدى
بالمراكبية هيلا هي
*****
6. دليب للبلد
الشمس ممسوكة عند أهلي الفتيحاب
والغيوم شمسية كابية على
الجزاير
الأرايل في المشارع
والخدر ضارب المشارق والمغارب
والمغارب
دامية مصلوبة المغارب
فوق هلالات الفناير
البحر ساقيه عسجد
من حمار الدنيا شارب
والهداهد في العلالي
وفي السحاب عاملالها شارع
عانية توتي النايمة فوق نهد
الجناين
شارفة فوق القيفة بانة
وفيها غنت سيسبانة
الحنين من صوتها طالع
زي مزامير البطانة
ناي بعيد عند المضارب
ينغمس في الروح يسارب
والبشيلن هن يمامات العديلة
دقن الليل بي هديلن
وغنن البنينة هيلن
بننن بنن بانينا يا بنينا هي
بننن بنن بانينا يا بنينا هي
باسم الله ابتديت
يا ربي ياباريني
والصلا والسلام
للحبه باريني
يا بنينا هي
الوطن السماح
الحبه باريني
قلبي على الولد
قلب البلد باريني
يا بنينا هي
نحنا بلدنا حالية نسايمو
يقدل عزة مين اللايمو
يا بنينا هي
شبرق فاطرو قامو نوايمو
رقاش البروق ودوايمو
يا بنينا هي
نيلو يدودي شايل عايمو
يحتل فيهو ما قام قايمو
يا بنينا هي
وقتين يوم يجيه الضايمو
فوق جناتو يلدو توايمو
يا بنينا هي
7.
رجال حلفا
الدنيا حدودها لفين
والأرض عليها حنين
يابحْر على البحاري
في الضلمة صبح بحرين
***
صدفات كانت في الشاطي
غربية على أرقين
صلح عثمان ما يطاطي(6)
والبيت غرقان في الطين
في الصحراء نعيش في قطاطي
بين عقرب والتعابين
***
ياصدف روح على داري
وللعمدة داوود في دغيم
الجامع مادنة واقفة
وفي الحتة دي كان النيم
مُـرْ عَ النخلة بتلاقيها
متكية في بحر ضليم
***
يا شيخ أحمد يا خيري
في النيل أرض الحجرين
أرضك جادت بالفيها
ما تغني عليها حزين
غنت فيها البلطية
وعامت فوقا الوزازين
***
أبوراس أيوب في اشكيت
الوادعة بغني عليها
يوم جات الموجة الراجعة
جابت سافل عاليها
اتلموا الخلق عشانك
أهلك من سرة وليها
***
إحنا اللي وقفنا قصادك
يا موج من بحر السافل
لا الحزن البيِّن صادك
ولا شمت فينا الغافل
بالفرحة نلمو حصادك
بالصفقة نرد الدين
***
الدنيا حدودها لفين
والأرض عليها حنين
يابحْر على البحاري
في الضلمة صبح بحرين
***
(1)
تحلقوا حوله
(2)
طحنوه - بعربي جوبا
(3)
هم بتاعو – ينتمي إليهم
(4)
قاعد أحبه
(5)
قاعد أريدو
(6)
الشيوخ أحمد عثمان،
العمدة داوود، أحمد خيري، أبوراس أيوب
الأربعة
الذين رفضوا التهجير وبقوا في حلفا القديمة مع المعاناة الشديدة
