القدال

دوباي لعشرة سنين بنات حفرة
امدرمان 29 يونيو 1999م

 يوم تتواري في شفق الصباح الطالع
الضي ينشرق بيكِ ويدَوْدِوْ شالِع
الخوف ينسرِب من نسمِك الطمَّنـِّي
 والنيل قلبو يبرد من رعاشو الهالع
الشمس مع جيتِـك .. بتمرق مِنـِّي .. عشرة سنين.

وعشرة سنين مخالطِك جـِنِّي
سُـفلي ينوني تحتِك .. ومن بكاكي يغنـِّي
سفلي .. مع الكلام .. أملس، مزركش .. غُنِّي
سفلي .. مع السلام .. دَلـََس البقول يا.. حِنِّي
سفلي .. وفي النظام .. إبليس وحالق سُنِّي، عشرة سنين.

وعشرة سنين .. وسوء الحال 
وسؤ الطالع
البلد المشتت خيرها في الأوحال
وكل من جاها 
 في دَغَشْ الصباح فَجَّـاها
بالدبابة والأرتال
وعِمة وكاكي لا راي لا فهم لا مال
جاك من ميسو قال باسم الله
آية وراية
آية وراية
نازل في المغارب .. سافِّي
طالع في المشارق .. بالِـع
الجنا جَنَّ من لحسة بيان إنقاذو
لامِن غَنَّى
واصبح في المراقص ضالع.
في فَدْ فَنَّة ..
عشرة سنين ولا هنَّاها
لا منَّاها
لا طمَّن عليها البال
 وما بننساها .. مابننساها
ما بنتكل عليك غناها
يا ليل المناحة الطال لعشرة سنين.

عشرة سنين وصبر أيوب
وسَفْ الطين
وسلقْ الطوب
وبطنِك خاوية شديتي الحزام مكروب
ومديتي القرع والعين
وعشرة سنين مزحلقة هاوية
ما معروف قرارِك وين
ولا كان النزول محسوب
وجرفِـك عالي
عالي عُلا الأماني الخاوية
والحفرة القصادِك ضلمة
 يلحق راسها في الأرضين
والحفرة القصادِك يمة
أبعد من حِبال صبرِك
ولكن ضُمة تقصَـر من حِبال بالي
فيا ويلِك على حالِك
ويا ويلِك على حالي
ويا ويل البعد .. جايين
إذا ما الحفرة .. تبقى الدين.

وعَشَرَه سنين وريدِك مويه
عشعش بالسموم والفاقه
ومن بعد الغنج والروقه
جاتِـك طامة
لاشبال بناتِـك هَـفَّ
لا بتعرف عيالِـك تويه
لا صفقة ولادِك لامَّه
والغمة العليك ساساقه
ما أدت شموسِـك طاقه
قلبِـك رفَّ
من وجع الملاريا العامَّه
لي رقب السحايا اللفَّ
مِـيته وخامَّه
عندِك فيها شِن بتقولي؟؟
عندك لا جمل لا ناقه، عشرة سنين.

عشرة سنين بنات حُفره وبنات الغَـش
ودقناً لطعه فوق الوش
وشال شاويش
وسُـمنه جديييدة لا بتضارى لا بتنفشْ
ؤزير قدامي بالنهب المصلَّح ..تااااامْ 
والقُـلَـل الوراهُ حَمَامْ
مَكَـرفّـس بالزبيب والتين
يخُجَّن كان ضحِك .. كان هَـشْ
وعين غرويدة من سهرة قيام الليل
علي الهَـبْـش المَعَ النفرة
وعلي الهبر الورا التمكين 
فيا ويلِـك من اللغة واستلاب الحَرْف
ويا ويلِـك من التفعيل
ومن معنى التوالي التاه
ويا ويلك من التعليل
 ومن قولاً صِـبـِحْ شَـفره
إذا هذا الهبِـِر في الفقر فكيفَ الهبشُ في الوفرة؟؟؟؟
وعشرة سنين مَـزارع يابسة
 والدين العليها يعلِّـي مُدْمَاك طوقا
والزارع شريك من أصلو
أصبح زي أجير واندلى
واتدهور صبح ماروقا
ما خابر مسورو وفصلو
من كـُتـْر الكلاب الكابسه
محفظْة البنوك العابسه
والطرَّاد
ضريبة الموية
حق الأمن وحق الطير
جباية الشونة حق العير
وزاد البير
وزاد للكل طمع في أكلو
لامن سدرو جاهو السُّـلْ
 وكبدو من الغبين محروقة عشرة سنين.

وجود يا نمي
جود لي شعبي بعد الصَبْنَه، جيب انسابو
وقول يا فمي
قول لي شعبي حِسَك في السُكَاتْ .. شِن نابو؟
عشره سنين علي رَبـَقي اللحو الجابو
صحَّت فيْ أباليساً تبتـَّلو .. تابو

حليلـَك من هضاليم الخلا البتشابو
ومن تفاحِك الفَدَع السبيط ربرابو
الخلاني ازازي مع الشَدَر .. سرسابو
صُلح المشتل الحزم الوسط قرقابو

وين يا اب عازه دفِّيق المشنْير كابو
وين يا اب عازة أيام المشبرق نابو
نحن الكي جديد ما بنخشى من ديدابو
لا الزمن الحزين بحجرنا لا دبابو

نحن اهل الجمال والزوق انحن اصحابو
فينا الفن مقسَّـم في الحضور والغابو
للحرية نحن عيالنا كيف يتشابو
يا طالب الريال .. نحن الوطن طُـلابو

يا ولدي العزيز ويقود محارق غابو
مارق للمحاص زرعاً فتق تيرابو
سارق منو دقن الغـَيَّـة روح اترابو
ما شيـَّبني غير راس العيال الشابو

البلد الرَبـَط قولو وعـِلـَت أحزابو
بكرة يفتِّح الدرس القـَفـَل أسبابو
الجامعة بتعود والشعب بجدع طابو
والفاكرنا غوش خلـِّي اليضري ترابو

ما بنساكَ يا العرف الإله في كتابو
تقدل في الجـِنان نيتك تودي رحابو
ناس الدنيا عاملين الدنيـَّة وعابو
ساوين البلد صَيـَّاً عوت كلِّابو

انتَ مرقتَ لى الليلة الله.. غيرَك هابو
 والدخلت على البلد العزيز .. مارقابو
قالولنا الصبر واجب حزم لبَّابو
وين للغيـَّر التايوتا قـفـَّل بابو

شن مارضني غير الفي القلب جبجابو
وشن معنى السلام لليله واقفة حرابو
يا وطن العـُزاز مين البدور أسلابو 
بكرة الصِحْ يصحْ ... كـُلْ فار وياكل .. صَابو. 

محمد طه القدال