القدال

أوبريت نساء بلدي محمد طه القدال تم في18/2/2010 1. أم الناس أنا السر في المعاني الجاهرة وانا البر في القلوب الساهرة وانا الإخلاص إذا الإخلاص خَلاص الذمة أنا البدي الحياة معناها واحد فرد ، وشعبِ وأمة أنا الأم البتبذل روحا لي كل من يقول يا يمة 2. الحبيبة تاجوج يا بهاك يا ود محلَّق شلت اسمك من بهاها وانت بي تاجوج معلق والقلوب قالت غناها زينة زي بنوتنا طالعة في الغروب طيب جناها وفي الجنوب أبنوسة تالعة وفي الشروق محزوم حشاها وفي الشمال نخلتنا فارعة كلهن حد السماحة وكلهن تاجوج معاها 3. التفاني رابحة الكنانية يا رابحة يا أم الحنين (لو نقَّط الضحوي البريق ) عصرية خَتـَّن حنتن، في السكة شالت حنتك دم المسافات الحريق (تحبل كما الأمات) وتشرق بالخبر يالماشي للمهدي الإمام أنا زي شوارع بالبنات متحيِّنة (برسل تراتيل الخروج ليهن وبقطع سرتن) شفت الحمام تقلي وانا والزواجل في قدير غنواتا من زجلي والرحلة تعريف الهديل وأنا من كنانه على العديل أنا رابحة بعرف أنتن (أنا يا عشاي زي بذرة في جوف الأرض أو ضحكة في طرف القلب بتغني لو جات في العيون والضحكة لاقت مرقتن) أنا رابحة يا ود بطني جيت لا تهت فيك لا غبَّت العين عرفتن 4. الشجاعة مهيرة وشغبة الليلة العريس مارقابو في البرزات بت المك مهيرة الحجلن فاردات غنت للعقيد والخيل مشن دافرات الفارس مرق لملمهن النافرات لا فاتن مراح لا قبلن شاردات زغرودتك صليلن والسيوف كارات شبالك ضفايرك بالمسك عامرات واخوانك بسروا البال غطا الجارات من شغبة البنات غنن غنا الاخوات فوق هيلن دفوفهن بالشكر قاحات سجعنو القصيد في الباردة والحارات لا هابن ولا عابن . . دقر تامات 5. فاطنة بت جابر(1) وبخيتة القديسة (2) بت جابر فوق ألواحا واخوانا الأربعة جوها حق الشرافة تمرنا لالوبة على الختموها يا ست جوزفين يا بخيتة في روما الباعد ميسا بت سودانية وفاردة ساجدة وعابدة وقديسة ظلم الأقراب والدنيا وسجن الأغراب ما يقيسا 6. المستقبل يا إيلاف ويا إيباء انا إيثار، سلمى وفطومة وانت مثاني وانا شيماء وانا ريري وساجدة وإسراء وانا وعد ودي حبيبتي ولاء وانا دانية وميري وحلومة أمنيّة ، نسيبة وأمونة وانا بت اماتكم آلاء نحن حلاوة الأمس الذكرى ونحن بنات العرس الليلة ونحن الغرس القايم بكرة ونحن الأخت الصابرة وصامدة نحن الأم الجاية حنينة ونحن الشكرة الفي البنينة السودان شلناه في قلوبنا ونحن العز نبنيه بايدينا نحن بنات بت زاهر خالدة نحن الأمة الخالدة ووالدة لنا القيام لنا القيم و لنا الخيار والاختيار (هذه الأرض لنا فاليعش سوداننا عاليا بين الأمم) ______________ (1) أولاد جابر الأربعة وأختهم فاطمة يرجع لهم فضل نشر التعليم عبر الخلاوي ، عاشوا بجزيرة ترنج بين نوري وكريمة أيام السلطنة الزرقاء ( حوالى 1590م) وهم أحفاد غلام بن عائد الركابي (2) الأم جوزفين بخيتة راهبة سودانية عاشت في إيطاليا واعتبرت من القديسات (1869-1947)