الأحد، 14 سبتمبر 2014
شاشاي
للدومه وحَـلــُّـومه ..
هـدّاي
للناس
دوباي
للنيل
(1)
دوباي النيل
مدَّ يمينو لي قيسانا
شمَّ شَـمِـيمُـو تحت التانا
عند نمولي، الشمال أدّاها فردة
وفَـرَّه
اتمغَّـى وسَـفَـلْ عَـمَـر
القيوف وانشرَّ
لاقاها اليمين
برق الهـطيل والدَّرَّه
شايلاه بالحنين
ختـَّـاها في امدرمانا
اتحـزَّمْ وسِـط واتحافَى توتي
السـُّـرَّه
يا واحدْ
عليك يا الواحد المنَّـانْ
إذا الاتنين بِـقـَـنْ واحد ...
فكيف واحد يكون اتنين فِـرِدْ
مـَـرَّه؟؟
خَـتـَـم بيـُّـوضة شال كيعانا
شقَّ الوادي بي حلفا وعَـبَر لي
سَـرَّه
أدَّاني النَـمِـيـمْ
وادَّاها طيب ألوانا
شرق الغربْ
وغرب الشرقْ
وسافِـل عالي
جُـوَّه وبَـرَّه
شـِـنْ معناهُ
غير نيلها العَـمَـتْ سودانا؟؟
(2)
الصايحة الما نايحة
البلد الغمّضْ ورمّضْ
شَـلّ وقَـلَّ
والجرح الكايس يضمّد
قام من نارو وصاح وتجلى
البلد الغالي شمال والحالي جنوب
الناس الطيبة شروق وغروب
الحق لانام لافات لامات
لا الواعي غَـفَـلْ
لا الداني جَـفَـلْ
لا الفوق ادَّلَّى.
يااهل
الغابة وناس القوزْ
النيل ..
الجبل ..
السَـهَـل ..
اليابو الفشَـل
الجابو الفوزْ
الحي الله والدائم الله
والحي شن كان غير اسم الله؟
(3)
الهدّاي الرضّاي
الحي الله والدائم الله
ياناس الهُــويْ
أهل السلطان والرَّكْ والدورْ
ياأهل العز الفي الـتـُــقَّـابَـه
ياناس الدين الكُمَّـلْ
الشالو قبيل للكعبة المَـحْـمَـلْ(1)
ياأهل
الخير البطن الأرضْ
وفوق
الفرضْ
وعند الوادي
وجوه الغابة ..
الدم مجبورْ
والحرب الطالت شن بتدور ..
غير المُـدْمــاك المتماسِـكْ
غير المستقبل والأطفال
حزن الأحزانْ ...
الحزن الغطـَّـى علي الآذانْ
...
كان حزن زنيم.
والدمعة القصَّـت قلب يتيم
ما قصَّـت غير قلب الأوطانْ
الخير الفيك .. كـُــلــُّـه في
ناسِـك
ولاإله الا الله
الخير شن كان غير نبي الله؟
(4)
هدَّاي العيال
وياعيالي
ياعيالي
الحيّ الله والدايم الله
يالفي
بـُـرام الخير
وزالنجا
العروسة
أبَّـا الفاشر الكبير
أمْـكُم نيالة دوسة
وَجنينه بحر الدين ..
كِـنْ تشيلو الجلالة ،
أبْـنَـرْكـَــبو البَـرْقه ..
أبْننزلو في نجالا ..
أبْـنَـزيلو الحـُـرقه.
دارفور بلاد الكُـلْ
ولا بتموتوْ كـَــلاله
من غَـرْبَـها لي شَـرْقَا
بلد العرب والزُرقه
والليلة ياعيالي
كِـنْ دُرتو قولة الحقْ
إنسان دا يا الانسان
من التراب والطين
من السحاب للبرق ْ
قول لاعرب لازُرْقْ
كَـوْ
لاعرب لا زُرْقْ.
وقبيلة شِـنْ نَـفَــرا؟؟
هي المابتجيب الفـَــرْقْ
إلا بتجيب الفـُـرْقَـه.
والحي الله والدائم الله
(5)
جَـرًّاري للأمم
ياالماشي في مشيتا
بخيط في طاقيتا
الحي الله والدايم الله
كِـنْ مابقت الشطارة ..
مابقت الحقارة.
والبوش(2) ما عندا دين
البوش دينا الدّواس
وشُـغُـلْـتا ماسونيه
أوْعـَـاً تقول خاواك
خـُـوَّة عدو الياباك
وَكِـضِـيـبْـتا عِـبرانيه
وأخوانه في (الإيباك)(3)
لا قَـلْـبا فيه حِـنِّـية
لابياكل الدامِـرْقا
لابيرقص النقارة
من الرهيد مابَـقَّ
ماعندي ليه شْكـارة
نحنا القبيل مُـشْـكالنا
بنْـحِـلـَّـه أجْـواديه.
داير الجيوش اممية؟؟
دبابة والطيارة ؟؟
والمرفعين شن يلفح ...
غير المُـرَاح الشَـقَّ !!
قَـطْع الحِبيل ما كاين ..
الإ المكان الـرَقَّ .
ياالماشي في مشيتا
بخيط في طاقيته
الحي الله والدايم الله
قول للامم جمعية
قول الحقيقة الحقه..
دارفور .. ولا العراق
عُـقْـب الخصيم يعَـرْقا.
سودان .. ولا أفغان
سوداني .. ما جرقاس
ولا (ألويا جَـرْقا).(4)
(6)
مردوم للفرسان
ياالفي السَـهَـل والوادي
يالفي الجبل من جَـمْ
الحي الله والدايم الله
العيال فرسان العزازة
والبنُّـوت رقب القزازة
والشيَّاب صبر الحرازة
والدم بَـجيب الدمْ
لايخلـِّي خال لاعمْ
لايسلـِّي أب لا أَمْ
بعد القطاطي حريـقْ..
بعد البَـعِـجْ والضرْبْ ..
ومغيب نَـهار السلـْـبْ ..
يبقي الحريق في القلـْبْ.
يالفي السهل والوادي
يالفي الجبل من جم
الحي الله والدايم الله
قول الحقيقة النار
دمَّ الولادة الحار:
الجنجويد كَـتَـلاني
ولْد امي ما قصَّر
ولْد امي كَـتَـلاني.
الزُبدة والغاية ....
ماعندي ليها سَـمِـي
الحربِ غوغاية (5)
تغزل خيوط الدِمِـي.
(7)
شاشاي لحلٌّـومه
شاشاي للدومة
وَحليمة بنت أمي
حليمة ست البنات
رتينة يوت بتْـبِـقْ
كهارِبَ البَـرقاتْ
لهيج عِـسيل الزِقْ
يتحالى في الشرْفَـاتْ
لا خَـمْـلة لا بتْـنِـقْ
وأديبة الحِـشْـمَـاتْ
أدُّومه وَلْـد امِّي
فارس الخيول الكُـمَاْت
طِـويره طارت شِـقْ
شِـقّـيشْ بُـلُـود الشتاتْ
وانتَ بْـتَـرَافي البِـشِـقْ
وانتَ المَـسورْ والحِـراتْ
كُـلْـكُم طَـفَّـاي الحِـرِقْ
عِـينْـتَـكْ مطر البُـخَـاتْ(6)
وَحليمة بنْـت أمي
حليمة ست البناتْ
أدُّومة ولْـدَ أمي
فارس الخيول الكُـمَـاتْ
طويرة طيرة الجوعْ
طارت مع الطايراتْ
لا خابرة كوع لا بُـوعْ
قاصدة المَـعَـسْـ .. كَـراتْ
وَحليمة قَـمَـر سِـبوعْ
وَجِـدَيْـةَ الفاشْـرِيَّـاتْ
أمْـكِ الماها الفُـروعْ
أمْـكِ الأصل الثباتْ
مِـعْـزَه وكانت رُتُـوعْ
شاردة مع النازِحـات؟؟
ترجع حـلُّـوم شُـموعْ
تـخْـسِـفْ ليل البُـغَـاةْ
والدومة الفي النٌّـجُـوعْ
عايد والي الولاةْ
والحزن الهَـدّدْ قـُـلـُـوعْ
حَـتَّ الحزنين حَـتَـاتْ
والعرس الطـوَّل يضوعْ
خُـمرة ورقصة وسَــباتْ
أدومة وحَـلـُّـوم .... حلاةْ
أدومة وحَـلـُّـوم ..
حلاةْ...
(8)
شاشاي للناس جمعية
... وحَـلاة الدومة وحـَـلـُّـومْ
وتطير طويرة الشُـومْ
ينزل جداد الوادي
فوق الرَّخَـم والبُـومْ
هَـدَّاينا فوق الرادي
والصفقه والمردومْ
جابودي(7) ود جَـبَّـادي
والشيله والقيدومْ
والزغـرَدَت .. بِـتْـعَـادي
والحَـنّـنَـتْ .. كـلتومْ
والجَـنّـنتْ .. فاطنادي
والقعدة والعِـيزُومْ
ونقَـضِّـي يومنا العادي
لا طـلْـقة لا دُوم دُومْ
في المدرسة والنادي
والشاي علينا عْـمُـومْ
واليَـبـَّـسَـتْ .. فَـرْهَـادي
والرقـَّـصَـتْ .. بِـتْـعُـومْ
والشـَّـبَّـلـَـتْ .. عَـبـَّـادي
من كلمة لي آزومْ
لي حسكنيتة الغادي ....
يا ناس الله
وأهل الله
الحُــبْ شِـقيش غير من الله
؟؟؟
الجنينة .. فوربَـرَنْـقا ..أمبدة
.. الفاشر .. حليوه .. 2007م
(1)
كسوة
الكعبة، كانت تحمل من دارفور
(2)
جورج بوش
(3)
مجلس
العلاقات الإسرائيلية الأمريكية وهو اللوبي المسيطر على القرار
(4)
البرلمان الأفغاني
(5)
آلة خشبية
قديمة لغزل القطن
(6)
مطر آخر
الخريف، البخات هم السعداء من أهل الحظ
(7)
الجابودي
والجراري والشاشاي والهداي والمردوم والصيحة والدوباي كلها أنماط في الغناء والشعر
