الأربعاء، 17 سبتمبر 2014
الصايحة
2009م
إلى شقيقتي الوارد بت طه ود دفع الله وإلى كل نساء السودان
(1)
الأخت الكبرى
أختي الأولي
وأمي التانية
عليها بغني غنى
الجنيات
شالت منها حِـن
الحانية
وجلبت لينا الزمن
الفات
غنوة تجيك يا بحر
الوارد
تغزل ليك اللحن
الشارد
نسمة تهفهف بالنمات
كلما تعلِّي ..
تعلِّي الأمة
وكلما تهلِّي ..
أشم اليمَّة
وكلما تطلِّي ..
تفوت الغُمّة
وترحل من بيننا
الأنَّات
شايلة احزانك وما
بتبالي
وتدي الناس كل
البسمات
عقلك وزن البلد
الغالي
وقلبك جمع الدنيا
حواها
محنة وطيبة
ونكران ذات
نحن أخوانك
بس أولادك
وعطفك زي عطف
الأمات
(2) ألأم المثالية
فالحة من تبَّت
والحنيِّن .. فات
خلف البنوت
ولا جوز جنيات
أصلو ما لانت
قوّت اللينات
بالقليل ربَّت
يا طواقي السوق
أصبحت وليان
يا صحون البوش
في الزقاق البات
سترة للخالات
ويا صوني الشاي
جنبها لقيمات
في المدارس حوش
للعلم رايات
واحة في البنوت
تقرى في الجامعات
واحدة جاها عريس
زينة الأمات
والوليد خرِّيج
بكرة يرقعنا
ويمة ينفعنا
ويا عشا البايتات
والصغير قدام في دروسو تمام
في الشهادة الميس
أمي ست البيت
وأمي ست الناس
أمي راجل البيت
أمي ماخدة الكاس
وامي في الأمات
قلبها الحساس
شاف طريقو وفات
ضمة ما وسواس
(3) الأنانية
يا ناس الله هووي
الدنيا مي ملحوقة
كل ما تشد عليها
تراها شاردة بروقا
الناس في النفس مسجونه ضيق طوقا
من حب النفس
بقت النفس مخنوقة
***
الشارع العريض ياسع مداينو وريفو
قسموه ناس فلان كل زول معلِّي صريفو
ختو العنقريب زرعوهو نيمو وليفو
أصبح زي زقاق مايودِّي هبة زيفو
***
بعد كمساري سوَّى الرخصة.. ساق الحافلة
من أدب الطريق لا شاف فرِض لا نافلة
يختف .. كان شبر قدام حديدتو الجافلة
ما هماهو لا شيخ لا صبيْ .. لا غافلة
***
جا الصينية دخل راسا .. واحد سدّو
والتاني انقفل قدامو ماسك يدو
والتالت رجع وراني
يلعن جدو
والكون انشبك
لفظاً يخجِّل ردو
***
يا ناس الله هووي العين منو البملاها
غير هذا التراب يوم تنعجن في تراها
الشح في النفوس شاحد الكريم يعفاها
بي كرم النفس العين تحتو شراها
والنفس إن سخت الليد بتدي براها
***
(4) الوظيفة
حق الوظيفة
الالتزام والهمة
والإيد النضيفة
الاحترام للذات لزومك
وبرضو للناس الوليفة
همة في شغل المهمة
ولقمة لولادك شريفة
الالتزام للناس أمانة
وزوق بحر
ماليهو قيفة
ما مكوِّم للجرايد في
الصبحات الأسيفة
والشواهي مع القهاوي
ونقة في الكورة التليفة
ناس فطورا على المكاتب
وشطة الفول الحريفة
كشرة في وش الخلايق
كلمة تجرح زول
عنيفة
خت مكانك في مكاني
وأطرى دي الوقفة البقيفا
الشمس والحر يلاوي
والصفوف جايبالا زيفة
الناس بتعرف وين شقاها
وشايفة بالعين الحصيفة
مين بيقضالها الحوايج
مين معاها ومين حليفا
لا محسايب
لا رشاوي
والمعاملة بالتساوي
والنضافة الفيك ما دايرالا ليفة
النفس لو كان عفيفة ..
انشا الله تنقد الرهيفة
***
(5) القدوة
يا أهل الله وين القدوة وين اب رسوة
لمّام الكتير .. البسوى والما بسوى
ديناب الهمل.. عبّار قماش الكسوة
رباي اليتيم .. غتاي مقانع النسوة
***
مما قمت كيِّس رايو نافد باصر
تاتاي الضعيف حاحاي شلاقة القاصر
وقت الراي تلف والناس تجول وتباصر
انت مرقت بالراي البفلِّق .. وماصر
***
إن كان في الكلام وزن الدهب من حرفو
والجنيات تحب زوقو الموارك ظرفو
مو غشاي مفاسد يوت مورع طرفو
غرفو الهانقدر ياتو البحصِّـل غرفو
***
حاننت القريب جبت البعيد دانيتو
والعاداكا دارقتو ومسايس خيتو
والزعلان مرق يضحك بعد راضيتو
والجالس حداك .. وينسى ويقاشر بيتو
***
إت الفي المثال .. مثلاً بيتفاشوبو
وات الفي الخصال تريان مترّع كوبو
وات الفي الفعال قدوة ومنار للدوبو
وات الفي الكمال ماليهو زارد توبو
القدوة الصميم .. ريِّس طبيعة وقايد
كل تفكيرو في الخير العميم الفايد
ما هماهو قول الكارهو والا الرايد
وان نزل التقيل يرفع ضراعو عمايد
***
