الاثنين، 9 يونيو 2014
طواقي الخوف
9/12/2010م
ما خايف المطر
يتحاشى الضهاري الراجية قولة
خيرا
ولا خايف المطر
يمشي على الصحاري تلمو في
بشكيرا
ولا خايف العشم
يتناسى العشامى براها تاكل نيرا
ولا خايف النفس
تتذكر نفسها وتنسى يوم حديرا
وخوفي على البلد
الطيب جناها وقمنا في خديرا
شاحدك يا كريم
لا تحصل خراب لا أرجى يوم وديرا
***
وانا ما بجيب سيرة الجنوب
وعيال بتسرح للمدارس
والفطور نجماً بعيد
بنوت بتجري
على الخطاطيب البتجرح
والعريس نجماً بعيد
والدكاكين التملا تفضي
السماسرة يسمسروا
والبسفو الطين
يسفوا
والبحتوا الراب يحتو
والبناطلين ليها سستم
والقوانين ليها سستم
البنوك الليها سستم
من سويسرا ولي ماليزيا
بالسفارات
والعمارات
والخبارات
وانا كنت متغطي
ومتدفي
العمة ملوية
والشال على كتفي
سودان وكان ما كان
سودان علي كيفك
السكة ساعة إيد
والأرض مروية
والناس حنان وظراف
والراح يجيك .. للحول
والخدمة مظبوطة
مع إنو مدنية
والدنيا حرية
الماشي درب الكار يغور
والتاب من التمباك يتوب.
وانا مابجيب سيرة الجنوب ..
الغبّوا عرفوهو
والسووا بلقوهو ..
......
أصبحت زي الزول
قادل بوسط السوق
سروالو نصلوهو
لو العِرق مسروق
أو قلبي نشلوهو
طعم الكضب مسلوق
ماسخ تضوقوهو
لو فمي ما مطلوق
أو كمي غسلوهو
ياني البسوي القوق
قولي البتابوهو
ماعندكم دمي
ما عندهم دمي
ما عندهم دمي
من دمي لا لا لا
ماقدروا فصلوهو.
وانا ما بجيب سيرة الجنوب؟
قول استقلْ ..
انا في صفوف الزوق
واقف مع الواقفين مزنوق يهنوهو
أواستقال
ودا أول الأحزان
أو قالوا باعوهو
ودا ياهو قطيع القلوب
أنا ما بجيب سيرة الجنوب
فالسيرة كمين ألف عام
لوني المحرق مندوكور
وشكلي شكلين
شكل منقة
وشكل تور
دمي المشتت من قبايل نوح وحام
شعري المقرقد زي حصايا
اتشتت فوق الدروب
كتفي المهدل بالعيوب
وانا ما بجيب سيرة الجنوب
أصل البقت
من ساس وسايس أو يسوس
بقت البقت
خلونا من حرب البسوس
الفاضلة
تكفير الذنوب
الفاضلة لمليم البشاتن
والمعاطن
والخبوب
الباقي
مايخموكا تاني على
الدفافير والكناتر والحروب
الباقي تعظيم التماسك
في الخطوب
لا نافع الشَّدة العلوق
ولا نافع المبقوص يحوق
لا بنفعك عَرَق الزنوج
ولابرقعك لبن العروب
إلا الوقوف ألفاً ضكر
واحد براك
في الشيمة تلفحك الهبوب
الغيمة تديك
للسفاسف
والعواصف
والمطر
برطع مع الأفعال
وادخل على التاريخ
يغلب أجاويدك
من قرقريب عوسك
اخرج من التاريخ
شيخك وعربيدك
لا نافعك التكفير
ولانافعك التوبيخ
فامشيه وحيدك
وامرق على التاريخ
تلقاه في السهلات
مستني كمسيدك
لا بيظلم التاريخ
ولا يرحم التاريخ
إياه عوس ايدك.
والأرض موقوت القنابل
في الحدود
والأرض منهبة الثعالب
والطحالب
والجيوش
باليوناميد
واليوناميس
والفُرقة بينات القبايل
والشتايم في المنصات
والشراكة الفي المكايد
والخناجرفي الحناجر
والمنابر
آه من تلك المنابر
إنداية كرتلة وبنابر
والجرايد داقة طارات
المدايد
الصَدَق في الناس كذوب
الساسة نِيّام العسل
بين انتباهة
وغفلتين
بين السلاطين والحبوش
والشلاتين
والقرايب
فين حلايب؟
واللي بنى الأرض كان في الفرض
سوداني
عيني عليها
اتمزعت
حتة في قلبي
وحتة ف غصتي .. تاني
آدي اسرائيل في النيل
بكِّيني ولعبطني
والنيل أدنداني
إحنا حبايب في الطيّبة والآه؟
آ.
غنيلي ورقصني ؟
طيب.
بسِّ سمعني آه الآه في وداني.
***
أنقد السقا وما بينصلح وكايو
وانكشح اللبن ما بينفعن بكايو
بعدن بى الدروب مابقصِّرِن
تكايو
والشاكي النقاص ناقص قمح شكايو
***
وما أكلوني
إذا ما أكلو التور الأبيض
وتورنا في الجزيرة
وبدر الله فوق سماهو
بدر الله يابساحوتة
مكوار حبس مياهو
عطشت قبايل ابقوتة؟
البودة في خلاهو
والأرضة في بيوتا؟
الزول رِبَت كلاهو
سمينة بي مقوتا
يا تمت المعاهو
أو خلصت الحدوتة
وما أكلوني
إذا ما أكلو التور الأبيض
***
يدر الله يابسلوكه
سلوكه في الجزيرة
كل يوم فينا بتنتش؟
سكك الحديد بي كم؟
بي كم بيت المفتش؟
والبيع بيعة عدوكا
بعت الأرض بترابا؟؟
باكر تبيع أبوكا
وان مت من تخمة باكر
ناس الشرق يبكوكا
وناس الغرب يبكوكا
ناس الشمال يبكوكا
وناس الجنوب يبكوكا.
وما أكلوني
إذا ما أكلو التور الأبيض
***
حمدتكم بالجاية
والجاية فوق الجاية
وعسكري الجباية
قلبك حجر اللداية
***
بشرتكم بالسادة
والسادة بعد السادة
وجرادة فوق جرادة
من دوكة لام كدلدة
***
حمدتكم بالواقعة
والصاقعة جنب الصاقعة
مقدودة مالها راقعة
والدمعة صابة وناقعة
***
بشرتكم بالتوية
والصبنة لي الدامبوية
في الحلة دي ام كدوية
ما تقعدوا شدرة موية
***
والأرض لا حليوة
ولاها دي الجزيرة
الأرض أمات الحنين
لو نقط الضحوي البريق
في الحين تبتق شهوتن
بتحبل
كما الأمات
وتشرق بالوحم
لو تسعة الميلاد بتمرق بالسنين
أو دي الشوارع
بالبنات متحينة،
ترسل تراتيل الخروج
في يوم
وتقطع سرتن
الأرض تعريف الهديل
هدل الحمام بشري
وشوق السلام انسان
بالحيل بيعرف أنتن
والأرض شافت
إلا خافت
من عيون الليل
تناجي حبيب
غريب
في الليل وتفرز غنوتن
زي بذرة في جوف الأرض
أو ضحكة عند طرف القلب
بتغني لو جات في العيون
والبذرة لاقت مرقتن
الأرض منصوص الضمان
حضن أمك الدافي وأمين
ريحة حبيب
جاياني من شمة حبيبتي وكرفتن
لو جاتا في يوم الهموم،
في الحين تزغرد فرحتن
أو حرقصت فوقها السموم،
باكر تهبهب نسمتن
والأرض ما بتعرف تنوم
ترتاح
وغابت جمتن
بس تدي
مدين للعديم
بالمدة تحفظ ذمتن
***
هن مارقات خلاهن
ما مارقات بلاهن
لي بصاص حداهن
إو قصاص براهن
هن مارقات تراهن
تريانات تراهن
والخوف ما حماهن
من شوفة حماهن
طمانات جناهن
بي لبنا معاهن
يوم الشينة جاهن
مرقن ليهو جاهن
بالعز المبطر
والزوق الدواهن
لا حايدات مداهن
لا قايدات عماهن
وما كشحن بلاهن
فوق زولاً أباهن
لو الضيم رماهن
هن ياهن
وما هن
***
وانا لا بجيب سيرة الجنوب
لاني زول بالمرة خايف
إلا شايف
إلا شايف
إلا شايف
***
أنا شايف المطر
يتحاشى الضهاري الراجية قولة
خيرا
وانا شايف المطر
يمشي على الصحاري تلمو في
بشكيرا
وانا شايف العشم
يتناسى العشامى براها تاكل نيرا
وانا شايف النفس
تتذكر نفسها وتنسى يوم حديرا
وانا شايف البلد
الطيب جناها وقمنا في شدِّيرا
...
...
شاحدك يا كريم
لا تحصل خراب لا أرجى يوم وديرا
