الثلاثاء، 3 يونيو 2014
نشيد اليوتوبيا(1)
إلى مصطفي سيد أحمد
في هذي المدينة الفاضلة
لبس الشعراء تيجان غار وهَجّوا
هَجّو مع النشيد .. والبوح
وغَـنّوا للغربة المتلـّـتة
في الزمن ..
المكان ..
الروح.
وما بين الرماد والنار
فضا الكلمات ومعناهم
بيمرقوا من هطيل النوح
ومغناهم
يشـقـشِـق للحياة والموت
يغـرِّد للمدائن الفاضلة جواهم
جزاير
دوح
****
قدر يوتوبي
ترحل في مداين الناس ...
مدينة .. مدينة
يندلق حِسّك حداهُم
قِطرة
قِطرة
تَعبّي صوتك بي نَـداهُم
مشدود وتر صوتـَـك ربابة
مسنود عليك صوت الغلابة
مفرود
من الزمن المفتـّق والمرتـّق بالرتابة
مولود
مع الجـِدة المعتقة والمجرتقة بالرحابة
ينسدل من شدوه إنشاد المزامير
ينسمع في شجوه ترتيل الصحابة
زمن يوتوبي!!
ترحل في العتامير؟
والمغاسل؟
والغـُنا المندلـّي من شطر السحابة؟
من عـَنا الأطفال؟
وأولاد المسادير؟
السنينهم فوق جوازات العصافير؟
الحنينهم ..
بحة الليل الطنابير؟
الحزينهم ..
حزنه في الجوف المطامير؟
نـُبْـلـُه يطلع زي شعاع
لا ولولة لا شيل ندابة
***
( يامطر عز الحريق )
( كمّل الناقص وفرضو)
(يا مشاوير الطريق)
شوفي حميد وأرضو
يا بلد ليلك غريق
طولو زي طولِك .. وعرضو
إن ضلامك حر طليق
أو سلامك أهلو قِرضو
آهِ من هذا السليق
يشتري الراجل وعرضو
الفرج باقيلي ضيق
والصِحاح العندي مِرضو
كم إديريجاً حليق
شان يعيش .. بي دقنو برضو؟؟
يا مدد قشة غريق
( يا مشاوير الطريق)
(يا وليدات الفريق )
لملموا الصابرين تعالوا
( رقصوا البنوت أعرضوا )
***
يا نخلة المقبول ظلالك
واصلة الشموس بي حريرة
ومجدولة من طيب شمالك
مروية عز الجزيرة
من همّي هـمـِّك سمالـِك
كـَسّـر همومي الجبيرة
لحن الوليد الرمالك
مِشرق يجـُبـْر كسيرة
طينك مقالد رمالك
تحتك مياهِك خريرة
شعرِك جريدِك حلالـِك
نَمّة غُناهُ الضريرة
غنوة بتقرب منالـِك
رعشة جروفي الخضيرة
غُنوة حبيباً شكالك
هجر البنية الأميرة
عند الترابلة القـُبالك
ضليلة صهد الهجيرة
يا نخلة السلفاب جمالك
في الناس غناوي المسيرة
لو جيدك الفارع بكالك
موّال دموعي العسيرة
أو نيلك السالك أمالك
جيهة المشاوير الحسيرة
أو قبلك المفجوع دنالك
روح الأناشيد المنيرة
شيليلي عِب وأمليلي شالـِك
من غناويهُ السميرة
شدي من صوتك حبالك
نشـّفي العرق الدميرة
قولي للجنيات سؤالك ..
يا نخلة بس متكية مالك ؟
بطنة سبايطِك عضيرة ؟
جدلة سبايبك ممالك
محصورة في فد ضفيرة ؟
ولا السلام البدالك
سراب الأماني الكبيرة ؟
لو صبري بيهدم جبالك
شن تبقى غير عيني الهميرة؟
***
قدر يوتوبي ترحل يا صديق
زمن يوتوبي ترحل في البريق
والمدينة الفاضلة نامت في العتامة
والعتامة تهاتي بالشعر الهيافة
والشعر متغطي بالكلمة السلامة
والسلام متداري في الولد الشليق
والوليد مندسّي في الحرف القيافة
والحروف الوردة تحلم بالرحيق
والحلم يتجاوز المعنى الرهافة
والمعاني تعاند الزمن الرحيل
والزمن يوتوبي يرحل في السحيق
والرحيل يوتوبي ..
ترحل يا صديق ؟
الرحيل الشفتو للناس العلامة
الرحيل الشفتو للمتلك قيامة
(1) المدينة الفاضلة
